Rritet Tensioni Ndërmjet Dy Koreve, Veriu "Në Prag Të Luftës"
- Urdhri për gatishmëri u dha nga lideri Jong-il
ROMË, 25 maj /ATSH-ANSA/ - Lideri koreanoverior Kim Jong-il ka urdhëruar ushtrinë të qëndrojë në gatishmëri për luftë, njoftoi agjencia e lajmeve koreanojugore Yonhap, që citon burime të Koresë së Veriut.
Tensioni ndërmjet dy Koreve u përshkallëzua papritur me sanksionet e djeshme të Seulit kundër Phenianit, pas fundosjes së një anije luftarake koreanojugore që shkaktoi vdekjen e 46 personave.
Urdhri i liderit Kim Jong-il për gatishmëri të lartë, "për të qenë gati për luftë nëse do të sulmohen", u bë i ditur nga refugjatët e Veriut në Seul, "North Korea Intellectuals Solidarity" (Nkis), sipas të cilit "gjendja e gatishmërisë u njoftua publikisht për të gjithë kombin". "Nkis" theksoi se urdhri është dhënë më 20 maj, të njëjtën ditë kur Koreja e Jugut shpërndau rezultatet e hetimeve të komisionit ndërkombëtar që arriti në përfundimin se një silur i një nëndetëse koreanoveriore goditi dhe fundosi anijen luftarake të Jugut. Ky incident ndodhi më 26 mars.
Pra gjendja e gatishmërisë është shpallur para se Koreja e Jugut të shpallte masat e rënda kundër Veriut, me bllokimin, ndër të tjera, të shkëmbimeve tregtare.
Ndërkohë Shtetet e Bashkuara dhe Koreja e Jugut kanë shpallur planet për manovra të përbashkëta antinëndetëse në të ardhmen e afërt.
/e.v/
