Himarë, 25 Maj 2010 NOA – Shpërthim i fuqishëm eksplozivi në shtëpisë së Vasil Bollanos, kryetar i Bashkisë së Himarës dhe kryetar i OMONIA-s, organizatë e minoritetit grek në Shqipëri. Ngjarja ka ndodhur në Himarë dhe shënohen dëme materiale, por fatmirësisht nuk ka viktima. Lajmi bëhet i ditur nga mediat greke të cilat kanë dhënë hapësirë të konsiderueshme duke mbajtur qëndrim për incidentin ende të paqartë, raporton korrespondenti i agjencisë NOA.
Ngjarja ka ndodhur në orën 00.15 duke gdhirë dita e djeshme (e Hënë), por nuk është bërë publike as nga z.Bollano dhe as nga policia e cila këtë incident nuk e ka raportuar dhe nuk e konfirmoi zyrtarisht.
Bëhet e ditur gjithnjë sipas mediave greke, se dëme ka pësuar jo vetëm shtëpia e z.Bollano por nga shpërthimi i fuqishëm janë dëmtuar banesat përreth si dhe disa automjete të parkuara.
“Nga shpërthimi i lëndës plasëse u shkatërrua porta kryesore e banesës së z.Bollano, u thyen xhamat e shtëpisë së tij dhe të fqinjëve të tij, u shkatërrua një automjet si dhe u dëmtuan pjesërisht disa të tjera”, - bënë të ditur mediat greke.
Nuk është hera e parë që një ngjarje e tillë i ndodh z.Bollano. edhe në periudhën e fushatës elektorale të zgjedhjeve të 28 qershorit që shkoi, një sasi lënde plasëse ishte vendosur në automjetin e tij, por për fat nuk pati viktima.
n.s/r.n/NOA
