Bullgari - Cia Mbështet Luftën Kundër Kriminalitetit Dhe Korrupsionit
SOFJE, 27 maj /ATSH-AFP/ - Drejtori i CIA-s, Leon Panetta u shpreh sot se agjencia amerikane e zbulimit do të vazhdojë të mbështesë përpjekjet e Sofjes në luftën kundër kriminalitetit dhe korrupsionit, njoftoi qeveria bullgare.
Gjatë një takimi me kryeministrin Boïko Borissov, Panetta premtoi vazhdimin e bashkëpunimit me Bullgarinë, mësohet nga një komunikatë.
Sipas ministrit të Brendshëm Tsvetan Tsvetanov në këtë takim u fol veçanërisht për operacionet policore të kryera muajt e fundit në Bullgari. Rrëmbimet e sipërmarrësve, trafiku i drogës, prostitucioni, korrupsioni, shantazhi janë bërë objekt i një sërë operacionesh policore të trajtuara gjerësisht nga media që prej fundit të vitit të kaluar.
Elementë të tjerë të bashkëpunimit bullgaro-amerikan, Sofia pranoi së fundi të presë një ish-të burgosur të Guantanamos dhe hapja së shpejti në Bullgari e një zyre të agjencisë amerikane antidrogë DEA, pasi vendi konsiderohet si kryqëzim i disa rrugëve që përdorin narkotrafikantët.
Lufta kundër korrupsionit dhe kriminalitetit në Bullgari po mbikëqyret në mënyrë të veçantë nga Komisioni Evropian. Vendi Ballkanik, anëtar i BE-së që prej vitit 2007, ka humbur qindra milionë fonde evropiane vitet e fundit për shkak të mungesës së efikasitetit në këtë fushë.
/I.Pu.
