Tiranë, 28 Maj, NOA – Komiteti Shqiptar i Helsinkit, përmes një deklarate të posaçme për shtyp, ka dënuar aktin e dhunës së ushtruar nga një biznesmen në dëm të arkitektit, artistit dhe shkrimtarit, Maks Velo.
“Nga informacioni i ofruar rezulton se ushtrimi i dhunës u krye nga një person që zhvillon veprimtari ndërtuese në Tiranë, i cili nuk është mjaftuar vetëm të dhunojë fizikisht, në mënyrë të paramenduar Velon, por edhe e ka kanosur atë për jetën”, thuhet në deklaratën e lëshuar nga Komiteti Shqiptar i Helsinkit.
“Veprimet e mësipërme përbëjnë një sjellje të kundraligjshme, së pari, sepse cenojnë integritetin fizik të një shtetasi dhe së dyti, janë një tentativë për të ndalur ushtrimin e të drejtës së lirisë së shprehjes”, shprehet KSSH më tej, lidhur me një rast të tillë.
Duke shtuar se Velo hezitoi në ndjekjen ligjore të kësaj çështje, për shkak të mosbesimit të tij ndaj organeve të drejtësisë.
“Me keqardhje konstatojmë se raste të tilla ngurrimi nga shtetasit, kohët e fundit, nuk janë të pakta. KSHH i bën thirrje gjithë opinionit shoqëror për t’u bashkuar me reagimet e shumta ndaj një sjellje të tillë, e cila nuk i shkon për shtat synimeve tona, mbarë kombëtare, për një shoqëri demokratike e me të drejta njerëzore. Heshtja është me pasoja për të gjithë, për sot dhe për të ardhmen tonë”, përfundon qëndrimi i Komitetit Shqiptar të Helsinkit, lidhur me një fakt të tillë.
n.e/NOA
