Nyt: Okb Kritikon Përdorimin E Avionëve Pa Pilot Nga Shba
NJU JORK, 28 maj /ATSH-ANSA/ - Avionët amerikanë të pilotuar në distancë që po përdoren kundër al Kaidës, janë kritikuar nga OKB-ja për arsye se mund të shkelin të drejtën ndërkombëtare.
Javën e ardhshme, më 3 qershor në Gjenevë, Philip Alston, i cili merret me çështjet juridike për Kombet e Bashkuara, do të paraqesë një raport me të cilit do të kërkojë ndalimin e përdorimit të avionëve pa pilot që kontrollohen nga shërbimet sekrete amerikane.
Sipas një artikulli të New York Times, Alston do t'i kërkojë Këshillit të OKB-së për të drejtat e njeriut që "pushteti i jetës dhe vdekjes" së avionëve pa pilotë të kontrollohet nga forcat e armatosura dhe jo nga shërbimet sekrete amerikane.
Raporti i Kombeve të Bashkuara nuk ka fuqi vendimmarrëse dhe nuk e cilëson përdorimin e avionëve pa pilot si krim lufte, por rrezikon të ketë një peshë të fortë simbolike mbi strategjinë antiterrorizëm të aprovuar nga presidenti amerikan Barak Obama.
Departamenti amerikan i Shtetit është përpjekur ta mbrojë përdorimin e mjeteve të komanduara në distancë duke konfirmuar se eksponentë të al Kaidës nuk respektojnë Konventat e Gjenevës sepse, për shembull, nuk përdorin uniformat luftarake.
/e.v/
