Libra Të Rinj Në Libraritë E Tiranës
TIRANË, 29 Maj /ATSH- Suada Daci/.- Stendat e librarive të kryeqytetit janë pasuruar me një numër librash të rinj nga autorë shqiptarë dhe të huaj. Disa prej tyre janë:
- "Hyjnitë Ilire", është një libër studimor që vjen nga gazetari Taulant Hatia. Në këtë libër flitet për kultet që nderonin ilirët dhe për hyjnitë e veçanta. Ai është i ilustruar me gjetje arkeologjike dhe me piktura të një piktori mitologjik. Ky libër i botuar nga shtëpia botuese "Uegen", vjen në dy gjuhë shqip dhe anglisht dhe kushton 1000 lekë.
- "Si lindi Toka dhe Njeriu", Përmbytjet e Mëdha, vjen nga autori Zecharia Sitchin. Libri rreket të hedhe dritë jo vetëm mbi historinë e krijimit të planetit të Tokës dhe njeriut, por edhe më gjerë, historinë dhe rrugën nëpër të cilën mund të ketë ecur krijimi i gjithë sistemit tonë diellor. Vjen si botim i shtëpisë botuese "Helga's Secrets" dhe kushton 1200 lekë.
- Dasma me 300 nuse", e autorit Xhafer Martini. Është një libër me rreth 200 tregime, gojëdhëna, përralla, etj. Këto tregime dhe përralla mbështeten në popull dhe ndërtohen mbi bazën e thënieve filozofike që shpalosin mënçuritë dhe përvojën e jetës. Kushton 1000 lekë.
- Autori Astrit Bishqemi sjell për fëmijët romanin "Klik Rrapatushët" në katër vëllime. Këto romane janë botuar nga shtëpia Botuese " Extra 2007", dhe kushtojnë 1000 lekë. /a.ke/
