Matura Shtetërore- Rreth 37 500 Maturantë Në Provimin E Letërisë
TIRANË, 29 Maj/ ATSH/.- Rreth 37 500 maturantë do të testohen për provimin e parë të Maturës Shtetërore, në provimin e detyruar të Letërsisë dhe Gjuhës shqipe, konfirmoi sot për ATSH-në drejtori i Arsimit Parauniversitar në Ministrinë e Arsimit dhe Shkencës, Fatmir Vejsiu.
Maturantët, tha ai, po zhvillojnë përgatitjet e fundit për këtë provim që nis më 1 qershor.
Edhe pse specialistët e hartimit të provimit janë ende të 'ngjuar' për hartimin e tezës, Agjencia e Vlerësimit të Arritjeve të Nxënësve, bëri të ditur se përmbajtja e pyetjeve të letërsisë dhe gjuhës shqipe, do të jetë në varësi të llojit të shkollës së mesme që ka mbaruar maturanti.
Testi i letërsisë dhe gjuhës shqipe ka si qëllim vlerësimin e njohurive dhe aftësive të nxënësve që mbarojnë shkollën e mesme, formimin letrar e gjuhësor të tyre. Teza do të përgatitet duke u mbështetur në linjat e përmbajtjes, të përshkruara në programin orientues që u është dhënë prej kohësh shkollave përkatëse.
Testi do të jetë i ndarë në dy pjesë. Secila pjesë e testit përmban fragmente veprash ose pjesë letrare të periudhave dhe gjinive të ndryshme letrare, ku përfshihen pyetje bazuar në pjesën e tekstit; pyetje që kërkojnë shpjegime, zëvendësime, komente, krahasime, analiza, interpretime, perifrazime, pyetje që kërkojnë nxitjen e imagjinatës dhe fantazisë së nxënësit, si dhe pyetje që kërkojnë përgjigje krijuese.
Vështirësia e pyetjeve do të jetë e përshtatur për të tri nivelet. Testi i provimit përmban 25 kërkesa, nga këto13 janë me alternativa dhe 12 me zhvillim. Njëra nga pyetjet me zhvillim është ese. Në total, për të marrë vlerësimin maksimal, maturanti duhet të mbledhë 50 pikë. Ndërsa koha e përcaktuar në dispozicion të çdo nxënësit për të dhënë përgjigjet e sakta do të jetë vetëm 2 orë e 30 minuta.
Maturantët përgjatë kohës përgatitore janë njohur edhe me rregulloren e provimit, e cila ndalon kopjimin, mbajtjen e çdo mjeti komunikimi etj./e.gj//a.ke/
