Sport-Merkato/ Dinamo Kërkon Portierin E Kombëtares Isli Hidi
- Aktualisht te Dinamo portën e ruan elbasanasi Elvis Kotori -.
TIRANË, 29 Maj /ATSH- Gjergji Mima/ - Kampionia e Shqipërisë, Dinamo, po përpiqet të ndërtojë një formacion sa më konkurrues për të përballuar turin e dytë eliminator të Ligës së Kampioneve, ku padyshim edhe kundërshtarët janë më të fortë.
Në fokusin e kampiones së Shqipërisë është portieri i kombëtares, Isli Hidi. Ish-gardiani i Tiranës, pas eksperiencave në Qipro (me Alki Larnaka) dhe Ukrainë (Krivbas), është pa ekip, pasi dhe kontrata me klubin ukrainas ka përfunduar.
Aktualisht, te Dinamo portën e ruan elbasanasi Elvis Kotori, i cili ka dhenë një kontribut të vyer në fitimin e dy titujve kampionë të bluve (2008 dhe 2010) në tre vitet e fundit.
Dinamo, 18-herë kampione e Shqipërisë, pritet këto ditë të zgjidhë edhe enigmën mbi trajnerin e ri, Shkëlqim Muça apo argjentinasi Blanko.
Nga drejtuesit blu për merkaton verore është përmendur edhe emri i Ansi Agollit, por duket se pranë afrimit është edhe 21 vjeçari i Flamurtarit, Franc Veliu. /a.ke/
