Vlore: Mot I Kthjellet, Favorizohet Lundrimi I Peshkarexhave
VLORË, 29 maj/ATSH-H.Koçi/.- Situata meteorologjike sot në gjirin detar të Vlorës parashikohet të jetë e stabilizuar. Moti do të jetë i kthjellët, me zhvillime resh që do të dendësohen në mesditë, ndërkohë që vlerat e temperaturave do të shënojnë rritje krahasuar me një ditë më parë.
Kjo tablo sinoptike do të favorizojë kushtet e lundrimit për peshkarexhat, që kanë dalë për gjueti brenda dhe jashtë gjirit detar të Vlorës.
Burime të Kapitenerisë së Portit bënë të ditur për ATSH-në se, sot era do të ketë drejtimin në kuadratin Jug-Jugperëndim, me shpejtësi që do të variojë nga 2-4 m/sek, deri në 6-8 m/sek në afërsi të bregut të detit. Temperaturat e ajrit do të arrijnë vlerat maksimale në 26-28 gradë celsius dhe ato minimale në 15-17 gradë celsius. Valëzimi parashikohet të jetë 0-1 ballë brenda gjirit detar dhe 3-4 ballë në det të hapur.
Trageti "Red Star" i linjës detare Brindisi-Vlorë do të lundrojë sot në itinerarin e kthimit drejt portit italian në orët e mesditës. /a.ke/
