Ankara, 30 maj, NOA - Kryeministri turk, Rexhep Taip Erdogan, ka akuzuar vendet perëndimore për mungesë të “sinqeritetit dhe ndershmërisë” në zgjidhjen e mosmarrëveshjes bërthamore me Iranin, njoftoi agjencia turke e lajmeve “Anatolija”.
Deklarata e Erdogan wshtw bwrw gjatë vizitës së tij zyrtare në Brazil. Ai kritikoi vendet e Perëndimit pse nuk flasin për Izraelin, i cili, sipas disa ekspertëve, ka arsenal bërthamor.
“Nuk keni qasje të njëjtë në raport me këtë çështje, ndërsa sillni tensione lidhur me Iranin. Konsideroj se kjo nuk është një qasje e ndershme dhe e sinqertë”, ka thënë Erdogan.
Tensionet ndërmjet Shteteve të Bashkuara dhe Turqisë e Brazilit, anëtare këto jo të përhershme të Këshillit të Sigurimit të OKB-së, janë rritur, pasi SHBA-të kanë kundërshtuar marrëveshjen e arritur më 17 maj midis Teheranit, Brazilit dhe Ankarasë, mbi shkëmbimin e karburantit bërthamor.
Pavarësisht nga kjo marrëveshje, Uashingtoni vazhdon të kërkojë vendosjen e sanksioneve të reja për Iranin, duke thënë se Teherani nuk po përdor programin bërthamor për qëllime civile.
Sekretarja amerikane e Shtetit, Hillari Klinton, ka thënë se marrëveshja e këtyre tri vendeve ka për qëllim “blerjen e kohës” dhe e “bën botën më të rrezikshme”.
m.xh/NOA/RFE
