471 Ojf Rajonale: Brenda 2011, Vendet E Ballkanit Perendimor Te Marrin Statusin E Vendit Kandidat Ne Be
-Deklarata i drejtohet Samitit të Sarajevës, ku mes të tjerave, kërkon që të nxiten vendet e rajonit që të përpiqen për marrjen e statusit si vend kandidat brenda vitit 2011-
TIRANE, 31 Maj/ATSH/- Plot 471 organizata të Shoqërisë Civile nga të gjitha vendet e Ballkanit Perëndimor janë bashkuar në një Deklaratë të përbashkët ku kërkojnë rezultate konkrete, përtej rikonfirmimit të të ardhmes europiane të rajonit nga Samiti i Sarajevës, që nis punimet në 2 Qershor.
Deklarata kërkon të nxiten vendet e rajonit që të përpiqen për marrjen e statusit si vend kandidat brenda vitit 2011; hapjen e negociatave për anëtarësim me Maqedoninë brenda vitit 2010 dhe më e shumta deri në fillim të vitit 2012, për vendet e tjera që kanë përparuar në procesin e integrimit.
Të 471 OJF-të e rajonit të ballkanit Perëndimor kërkojnë që t'i jepet shtysë e re përfundimit të procesit të liberalizimit të vizave për të gjithë vendet e Ballkanit Perëndimor, duke përfshirë Kosovën.
Gjithashtu kërkojnë që Samiti i Sarajevës të nxisë qeveritë e vendeve të rajonit që të mundësojnë udhëtimin pa viza brenda rajonit si mjet për të përmirësuar komunikimin dhe bashkëpunimin rajonal, etj.
Mes të tjerave, Deklarata kërkon që BE-ja duhet të përcaktojë standarte të qarta, transparente dhe të matshme, të cilat mund të monitorohen nga organizatat e shoqërisë civile dhe mund të çojnë në vënien e qeverive të rajonit përpara përgjegjësive, etj.
Deklarata i drejtohet Herman Van Rompuy, President i Këshillit Europian dhe Jose Manuel Barroso, President i Komisionit Europian, Qeverive të vendeve antare të Bashkimit Europian dhe Qeverive të vendeve të Ballkanit Perëndimor, ku kërkohet nxitja më tej e procesit të anëtarësimit të vendeve të rajonit në BE.
Duke vënë theksin tek rëndësia e ruajtjes së stabilitetit në rajon, deklarata kërkon përforcim të mundësive për zhvillim të mëtejshëm demokratik dhe rimëkëmbje ekonomike; rikonfirmim të zotimit të BE-së dhe vendeve të Ballkanit Perëndimor për të punuar bashkërisht për përshpejtimin e procesit të anëtarësimit si dhe të dënohet çdo copëzim apo ndarje e mëtejshme sipas etnive.
Kjo deklaratë është firmosur nga 471 OJF nga fusha të ndryshme nga Shqipëria, Kosova, Bosnje-Hercegovina, Sërbia, Mali i Zi, etj./n.m/
