Policia E Shtetit: 3 Milion Lekë Për Gjetjen E 6 Vjecares Së Zhdukur 9 Ditë Më Parë
TIRANE, 31 Maj/ATSH- Mira Shkurta/- Policia e Shtetit ka vënë në dipozicion një shumë prej 3 milion lekësh për çdo person që mund të japë informacione për gjetjen e 6 vjeçares, Bleona Mata nga fshati Zapot i rrethit të Kukësit, e zhdukur në rrethana misterioze 9 ditë më parë.
Lajmin e ka bërë të ditur nga Kukësi, drejtori i Përgjithshëm i Policisë së Shtetit, Hysni Burgaj, pas një takimi që ka bërë me përfaqësuesit e policisë së qarkut në verilindje të vendit, të cilat prej 9 ditësh janë duke zhvilluar kërkime intesive për gjetjen e së miturës. Më parë policia e qarkut të Kukësit kishte vënë në dispozicion 500 mijë lekë për gjetjen e 6 vjeçares.
"Policia e Shtetit po bashkëpunon me policinë e Kosovës dhe atë Maqedonisë për gjetjen e së miturës", ka konfirmuar drejtori Burgaj.
Fshati Zapod ndodhet rreth 40 kilometra larg qytetit të Kukësit dhe rreth 400 metra larg kufirit me Kosovën dhe nisur nga kjo policia e Kukësit ka kontaktuar dhe me policitë e dy vendeve fqinje, por deri tani kërkimet këtej e andej kufirit kanë qenë pa rezultat. Pista kryesore e zhdukjes së vajzës së mitur mbetet ajo e rrëmbimit për qëllime trafikimi.
Një ditë më parë, policia e Kukësit arrestoi 29 vjeçarin Luftëter Jakupi, fqinji i familjes Mata, pasi gjatë seancave hetimore ai ka ndryshuar shpesh herë dëshminë lidhur me rrethanat e zhdukjes së 6 vjeçares. Jakupi, sipas policisë, dyshohet të ketë parë një autoveturë që është larguar me shpejtësi në afërsi të fshatit, menjëherë pas zhdukjes së vajzës 6 vjeçare.
Ngjarja zë fill rreth orës 17.00 të datës 22 maj, kur babai i vajzës dha alarmin për zhdukjen e papritur të saj. Vajza e mitur, sipas të atit, ishte duke kullotur delet në livadhet pranë fshatit. Delet janë kthyer, por jo vajza e vogël, gjë që ka shqetësuar familjarët e saj, të cilët kanë informuar menjëherë policinë si dhe banorët e fshatit, të cilët kanë nisur kërkimet. Zhdukjen e papritur të 6 vjeçares nuk e kanë vënë re as fëmijët e tjerë që kanë qenë pranë saj duke kullotur bagëtinë, por vetëm kanë gjetur xhupin e saj në lëndinën rreth 500 metra sipër fshatit.
/f.n/
