Shkup, 1 Qershor, NOA –Turqit, serbët dhe boshnjakët insistojnë në idenë për sigurimin e 10 vendeve të garantuara të pakicave, por duke kërkuar mbështetje për këtë edhe nga partitë shqiptare.
Një nga kushtet që kanë theksuar deputetët e këtyre pakicave ka qenë se deputetët e garantuar nuk do të rrezikojnë parimin e Badenterit në votimin e ligjeve si në Parlament, ashtu edhe në seancat e komisioneve parlamentare, siç është Komiteti për marrëdhënie ndëretnike.
Deputetët e pakicave kanë kërkuar mbështetjen nga kreu i BDI-së, Ali Ahmeti, me të cilin kanë kërkuar realizimin e një takimi me liderët e partive të pakicës.
Arsyetimi i deputetëve të pakicës është se ata nuk rrezikojnë Badenterin, për shkak se për votimin e ligjeve sipas këtij parimi do të kenë të drejt vetëm deputetët e listave nacionale të partive dhe koalicioneve dhe jo deputetët që kanë postet e garantuara.
“Nuk do të shkelet parimi i Badenterit, sepse për atë nuk do të kenë të drejtë të votojnë deputetët e listës së vendeve të garantuara për pakicat”, ka theksuar deputeti serb, Ivan Stoilkoviç, i cili ka theksuar se kanë gjetur modelin e zgjidhjes që nuk rrezikon shqiptarët në parlament.
Për mbështetjen e propozimit, i cili kohëve të fundit u hodh nga LSDM-ja është deklaruar edhe Partia Demokratike e Turqve, e cila gjithashtu ka kërkuar mbështetjen e partive politike.
Në BDI deri tani kanë refuzuar çdo nismë të tillë, duke theksuar se ideja megjithatë është shqyrtuar dhe do të jepet përgjigje e sërishme nga ana e kreut partiak.
NOA-INA
