Tiranë, 1 Qershor, NOA – “Sali Berisha, vijon të flasë, siç bëri edhe sot, për rritje ekonomike kur vendi është në një krizë të thellë, jo vetëm ekonomike por edhe sociale, aq sa varfëria ka kapur majat”.
Kështu e ka nisur deklaratën e tij për shtyp ditën e sotme, deputeti socialist Erjon Braçe, lidhur me krizën ekonomike në vend, duke apeluar për lavdet që sipas tij hedh kreu i qeverisë mbi zhvillimin aktual ekonomik dhe progresin që po shënojmë nga dita në ditë me treguesit.
“Sali Berisha, vijon të flasë, siç edhe sot gjithë ditën, për stabilitet financiar, kur financat publike janë në krizë të thellë, duke hapur në vetëm 4 muaj në buxhetin e shtetit për vitin 2010, një gropë prej 100 milion dollarësh”, tha ai.
Duke shtuar më pas se “borxhi publik vijon të rritet dhe ka kapur nivelin 634 miliardë lekëve të rinj dhe me risk të lartë financimi, pra mbi 6.3 milionë dollarë”.
“Borxhi i jashtëm i Shqipërisë në vetëm 2 vitet e fundit, të qeverisë së Sali Berishës, pra nga 2007 në 2009 është rritur me 66% ose në vlerë mbi 650 milionë euro”, vuri në dukje deputeti socialist.
Në fund, shtoi se për këtë shkak, pagesat e borxhit parashikohen me rritje të fortë.
“Në dokumentat zyrtare të qeverisë, pra në programin afatmesëm financiar të shpallur publik të votuar qeverisë së Republikës së Shqipërisë, duke arritur në vitin 2010, pra në vitin e qametit, në 90 miliardë lekë të rinj ose në 900 milionë dollarë”, parashtroi Braçe.
n.e/NOA
