Flotilja - Kina E Tronditur Nga Sulmi Izraelit Dhe I Kërkon Okb-Së Një Përgjigje Të Shpejtë
PEKIN, 1 qershor /ATSH-AFP/ - Kina u shpreh e tronditur nga sulmi i ndërmarrë dje nga marina izraelite kundër një flotiljeje humanitare ndërkombëtrae që ishte nisur për në Gaza dhe kërkoi "një përgjigje të shpejtë nga OKB-ja pas sulmit që shkaktoi vdekjen e nëntë personave.
"Jemi shumë të tronditur pas sulmit izraelit kundër një flotiljeje turke që transportonte ndihmë humanitare drejt Gazës që shkaktoi disa viktima dhe e dënojmë atë", deklaroi në një komunikatë dje në orët e vona të mbrëmjes zëdhënësi i Ministrisë së Jashtme, Ma Zhaoxu.
"Jemi për një përgjigje të shpejtë të Këshillit të Sigurimit të OKB-së që ai të marrë masat e nevojshme", deklaroi Yang Tao, këshilltar i misionit të OKB-së në Kinë, gjatë mbledhjes urgjente të Këshillit, i cituar nga agjencia zyrtare kineze Hsinhua.
Zëdhënësi i ministrisë i kërkoi gjithashtu Izraelit të përmirësojë situatën humanitare në Gaza që është bërë objekt i një bllokade që prej vitit 2007 dhe të zbatojë rezolutat e votuara tashmë.
Sulmi në ujërat ndërkombëtare kundër flotiljes që u përpoq të thyente embargon e vendosur nga Izraeli në Gaza shkaktoi një zemërim ndërkombëtar dhe e futi Izraelin në një krizë të rëndë diplomatike.
/I.Pu.
