Nishani: Inspektimet Ne Prokurori Ne Respekt Te Ligjit
-Gjatë raportimit në Komisionin e Ligjeve për inspektimet në sistemin e prokurorisë për vitin 2009-
TIRANË, 1 Qershor/ATSH/ - "Inspektimet në sistemin e prokurorisë kane qenë në respekt të ligjit". Kështu u shpreh sot ministri i Drejtësisë, Bujar Nishani, gjatë raportimit në Komisionin e Ligjeve të Kuvendit, lidhur me rezultatet e inspektimeve tematike të bëra nga kjo ministri në institucionin e Prokurorisë në vitin 2009.
Duke raportuar para Komisionit, Nishani tha se "nuk është konstatuar asnjë rast i vetëm kur nga inspektorët e ministrisë të jenë tejkaluar kopetencat, madje as nga vetë prokuroria". Ndërkohë, që sipas tij, rekomandimet për përmirësimin e punës "janë mirëpritur nga prokuroria".
Duke paraqitur konkluzionet e raportit, Nishani evidentoi se rastet e shkeljeve te konstatuara ne veprimtarinë e prokurorisë për 2009 kanë pasur tendencë në rënie nga nje vit me parë.
Duke folur për problematikën e hasur në këto inspektime, ministri i Drejtësisë shprehu shqetësim për atë që e quajti "mbajtjen në dorë të kallzimeve penale, pa një vendimarrje nga prokurorët për fillimin ose jo të hetimit të saj". Kjo, mund të bëhet shkak për lindjen e dyshimeve për afera korruptive, nënvizoi Nishani.
Kreu i ministrisë së Drejtësisë theksoi edhe raportin e prokurorit me Kodin e Procedurës Penale, duke e cilësuar Kodin si një instrument të rëndësishëm në punën e prokurorit, që në rast se neglizhohet mund të sjellë dështimin e punës hetimore.
Si probleme të konstatuara nga inspektimet në prokurori, Nishani renditi disa raste të pushimit pa arsye të çështjeve penale, analizën e njëanëshme të çështjes apo zvarritjen e afateve hetimore, konstatime këto në disa prokurori si në atë të Kavajës Shkodrës, Tiranës apo Beratit.
Seanca e zhvilluar sot në Komisionin e Ligjeve u shoqërua me debate të shumta nga deputetet e pozitës dhe opozitës, të cilët ndanë qëndrime të kundërta për inspektimet e Ministrisë së Drejtësisë.
Kështu, përfaqësues të maxhorancës, deputetët Dashamir Sula, Eduart Halimi, etj, duke vlerësuar punën e ministrisë, e nxitën atë për të forcuar bashkëpunimin me prokurorinë dhe organet e tjera të drejtësisë si për realizimin e reformës në këtë sistem, ashtu edhe për rritjen e efikasitetit në luftën kundër krimit, sidomos atij të organizuar dhe korrupsionit.
Ndërsa, përfaqësues të opozitës, deputetët Saimir Tahiri, Shegushe Ligori, etj, duke shprehur rezerva për inspektimet e Ministrisë së Drejtësisë, i cilësuan ato si jo profesionale dhe si mjet presioni ndaj prokurorisë./a.m/s.s./
