Vlorë: Moti, Përmirësim Gradual, Kushte Normale Lundrimi
VLORË, 5 Qershor/ATSH-H.Koçi/.-Situata meteorologjike sot në gjirin detar të Vlorës parashikohet të përmirësohet gradualisht. Në pjesën e parë të ditës moti do të karakterizohet nga vranësira dhe zhvillime të dendura resh, të cilat gjatë pasdites do të vijnë duke u pakësuar. Kjo do të shoqërohet edhe me një rritje graduale të vlerave të temperaturave krahasuar me një ditë më parë, ndërsa kushtet e lundrimit parashikohen të jenë normale.
Burime të Kapitenerisë së Portit bënë të ditur për ATSH-në se sot era do të ketë drejtimin në kuadratin Jug-Juperëndim, me shpejtësi nga 4-6 m/sek, deri në 8-10 m/sek në afërsi të bregut të detit. Temperaturat e ajrit do të arrijnë vlerat maksimale në 23-25 gradë celcius dhe ato minimale në 14-16 gradë celcius. Valëzimi parashikohet të jetë 0-1 ballë brenda gjirit detar dhe 4-5 ballë në det të hapur.
Trageti "Red Star" i linjës detare Brindisi-Vlorë pritet të lundrojë sot në itinerarin e kthimit drejt portit italian në orët e mesditës./s.s./
