SHBA, 6 Qershor 2010 NOA - Një nënë nga Kalifornia ka arritur të gjejë dy fëmijët e saj, të cilët ishin zhdukur 15 vite më parë dhe kjo falë faqes së Facebook. Gruaja nuk i kishte parë fëmijët e saj që nga viti 1995, kur në atë periudhë ajo ishte ndarë me bashkëshortin e saj dhe kujdestaria e fëmijëve i përkiste nënës por, babai kishte marrë fëmijët duke u larguar nga vendi ku jetonin, San Bernardino.
Ajo provoi të gjithë mënyrat e mundshme për të arritur një kontakt me fëmijët dhe për të gjetur vendndodhjen e tyre por, asnjë nga këto nuk pati sukses.
Në atë pikë, tepër e dëshpëruar ajo vendosi të besonte fatin tek rrjeti shoqëror i Facebook, ku duke shkruar emrin e vajzës së saj, tashmë adoleshente, zbuloi se jetonte së bashku me të atin dhe vëllain në Florida.
Pasi u vu në dijeni të këtij fakti, menjëherë lajmëroi autoritetet që arrestuan bashkëshortin e saj, duke e akuzuar atë për rrëmbim dhe shkelje të marrëveshjes për kujdestarinë e fëmijëve.
r.b/NOA
