Kukës: Edhe Forcat E Policisë Kosovare Në Kërkim Të 6 Vjeçares Së Humbur
KUKËS, 7 qershor /ATSH-R.Hoxha/ - Drejtuesit e policisë kosovare ranë dakort sot gjatë një takimi me përfaqësuesit e policisë së qarkut të Kukësit, që u zhvillua sot në Prizren për të shtuar forcat policore në kërkim 6- vjeçares së zhdukur nga fshati Zapod i rrethit të Kukësit.
"Në bisedimet e ditës së sotme me homologët tanë të Kosovës kemi rënë dakort që të shtojnë kërkimet e hetimet për zbardhjen e së vërtetës së kësaj ngjarjeje", tha për ATSH-në përmes telefonit nga Kërsteci Kosovës, nëndrejtori i policisë së qarkut të Kukësit, Xhafer Elezi.
Sipas tij, "sërish ka nisur kërkimi për 6-vjeçaren e zhdukur në një zonë të gjerë të Kosovës nga një numër i madh policësh të Kosovës, por ende nuk ka ndonjë gjurmë të saj", thotë Elezi.
Në operacionin e kërkimit janë përfshirë edhe ekspertë të UNMIK-ut.
"Në të gjithë kërkimet janë të pranishëm ekspertët e policisë së dy vendeve", thotë Elezi.
Sipas tij, kërkimet dhe hetimet janë shtrirë në një zonë të gjërë të Prizrenit e Dragashit në zonat ku ndodhen edhe disa të afërm të fëmijës së zhdukur, por deri tani nuk ka ndonjë gjurmë të saj.
Gjatë ditës së sotme është zhvilluar një takim i gjerë mes policisë kosovare e shqiptare, kryesisht për gjetjen e vajzës së zhdukur 16 ditë më parë në fshatin Zapod të rrethit të Kukësit.
"Pavarësisht telefonatave të orëve të fundit, nga kontrollet e ushtruara nuk është evidentuar ndonjë gjurmë e 6 vjeçares", tha Elezi.
6-vjecarja Bleona Mata rezulton e zhdukur që prej 22 majit, ndërsa për çdo person që mund të japë informacion të saktë për vendndodhjen e saj, nga Policia e Shtetit është akorduar një shpërblim prej 3 milion lekësh, duke ruajtur anonimatin.
Familjarët e Bleona Matës janë të dëshpëruar për çdo lloj informacioni në lidhje me fatin e fëmijës.
"Të paktën të dimë çfarë ka ndodhur me të", thotë babai i vajzës, Izmir Mata./ch/
