Tiranë, 8 qershor, NOA – Partia Socialiste deklaron se korrupsionin vazhdon të mbetet problemi kryesor për ekonominë në vend. Duke ju referuar raportit të Bankës Botërore, deputeti i PS-së, Ilir Beqja u shpreh se taksa e korrupsionit është rritur me 230% . Sipas tij qytetarët po vidhën nga politika e “duarve të pastra”.
“Nëse në vitin 2005 ryshfetet rrisnin kostot e produkteve e të shërbimeve me 2.5 %, në vitin 2008 ryshfetet rrisin kostot e produkteve dhe shërbimeve me 5.8 %. Shifra e parave që shkon në xhepat e oborrtarëve të babëzitur është rritur me 230 % nën qeverisjen e Sali Berishës. Kjo do të thotë se shqiptarët po vidhen me fatura marramendëse nga ‘duart e pastra’”, tha Beqja.
Ai theksoi se raporti i Bankës Botërore ka konfirmuar shqetësimet e PS-së në lidhje me situatën ekonomike.
“Së fundmi edhe Banka Botërore deklaron se “Taksa e kohës” është në Shqipëri më e lartë se kudo tjetër në rajon e në Europë. Menaxherët e firmave shqiptare harxhojnë më shumë se kudo tjetër kohë për t’u marrë me njohjen e rregullave që ndryshojnë kohë pas kohe dhe me marrëdhënie personale me organet ligjzbatuese”, tha deputeti i PS-së.
Beqja akuzoi qeverinë për rritjen e çmimeve si pasojë e krijimi të monopoleve. Ndërsa shtoi se “procedurat e prokurimit dhe konçesionet janë fund e krye klienteliste dhe se e vërteta e tyre fshihet ashtu si e vërteta e vullnetit të zgjedhësve shqiptarë në 28 qershor 2009”.
Nisur nga kjo, Partia Socialiste deklaron se “të bësh biznes në Shqipëri është tashmë e papërballueshme” dhe se “qeveria nuk qëndron në krah të biznesit, por e rrjep atë çdo ditë e më shumë”.
m.xh/NOA
