Tiranë, 8 qershor, NOA - Ndihma dhe mbështetja e Rumanisë ndaj Shqipërisë gjatë gjithë kësaj periudhe, në mënyrë të veçantë për anëtarësimin në NATO dhe për ecjen përpara me shpejtësi në të gjitha hapat drejt integrimit evropian ka qenë e vazhdueshme dhe mjaft e rëndësishme.
Një fakt të tillë, kryeministri Berisha ia bëri me dijeni në një takim presidentit të Rumanisë, Trajan Basesku dhe delegacionit që e shoqëronte.
Nga ana e tij, Basesku tha se Rumania ka një interes të madh që Shqipëria dhe vendet e tjera aspiruese të Ballkanit Perëndimor të bëhen sa më shpejt anëtare të familjes europiane.
Por Berisha nuk ka harruar t’i shprehë Baseskut edhe falënderimin mbi mbështetjen që populli rumun i dha komunitetit të shqiptarëve të Bukureshtit, të cilët dhanë një kontribut të rëndësishëm në historinë e kombit shqiptar në fillimet e shekullit të kaluar.
Më tej, kryeministri Berisha e njohu presidentin rumun me reformat politike ekonomike dhe institucionale dhe arritjet e rëndësishme të qeverisë shqiptare në të gjitha fushat, duke u ndalur në veçanti në potencialet e jashtëzakonshme që vendi ofron për investitorët rumunë në sektorë, si energji e rinovueshme, turizëm, industri minerare.
Në këtë kontekst, u rikonfirmua vendosmëria e të dy vendeve për të nxitur investimet e ndërsjella, si dhe për të zgjeruar dhe intensifikuar bashkëpunimin në të gjitha fushat.
Takimi përfundoi me rikonfirmimin e vullnetit të të dy vendeve për vijimin e bashkëpunimit në të gjitha fushat dhe për mbështetjen e Rumanisë në hapat e mëtejshëm të integrimit të Shqipërisë drejt BE-së.
n.e/NOA
