Tiranë, 9 Qershor, NOA /Blerina Ahmetaj - Universiteti i Tiranës do të ngrejë një grup kërkimor në Institutin e Studimeve Evropiane, i cili do të shërbejë në proceset integruese të vendit tonë në Bashkimin Evropian.
Lajmi është dhënë nga rektori i Universitetit të Tiranës, Dhori Kule, i cili tha se grupi kërkimor pranë Institutit të Studimeve Evropiane, do të përbëhet nga pedagogë dhe kërkues të rinj, të cilët janë pjesë e stafit akademik të Universitetit të Tiranës.
“Kërkuesit e rinj të cilët kanë një eksperiencë të vyer jashtë vendit tonë dhe që vijnë nga disiplina krejt të ndryshme, do t’i përgjigjen në këtë mënyrë kërkesave dhe sfidave të kohës, siç është trajtimi shumë-disiplinor i proceseve si ai i integrimit të Shqipërisë në Bashkimin Evropian.
Me anë të këtij grupi, Universiteti i Tiranës jam i sigurt se do të japë një ndihmesë konkrete dhe shumë të madhe në integrimin e vendit tonë në BE”, - tha rektori Kule.
Gjithashtu, rektori Kule prezantoi edhe organizatën më të re të studentëve në Universitetin e Tiranës, Rrjetin e Studentëve Ekselentë.
“Jam i kënaqur të prezantoj edhe një tjetër projekt të trupëzuar tashmë të studentëve të universitetit tonë.
Ata kanë krijuar tashmë Rrjetin e Studentëve Ekselentë, ku bëjnë pjesë studentët më të mirë të të gjitha programeve që ofron universiteti ynë.
Gjithashtu, ku grup do të përfshihet në grupe kërkimore dhe pse jo, dhe me grupin kërkimor të ngritur në Institutin e Studimeve Evropiane", - tha rektori.
b.a/n.e/NOA
