Tiranë, 9 Qershor, NOA – Kompania greke e ndërtimit AKTOR, që ka marrë pjesë në ndërtimin e projekteve të mëdha në shtetin helen, si në ndërtimin e urave të mëdha, qendra të Lojërave Olimipike, aeroportin e Greqisë si dhe në ndërtimin e një pjese të rrugës Egnatia, do të investojë në projektet e mëdha të infrastrukturës shqiptar.
Këtë vendim të kompanisë greke AKTOR, e deklaroi sot në takimin me kryeministrin Sali Berisha, kryetari i bordit drejtues të kompanisë greke, Dimitris Koutras.
Koutras i prezantoi kreut të qeverisë, projektet e mëdha, në të cilat ka punuar kompania Aktor, duke theksuar se qëllimi i drejtuesve të kësaj kompanie ndërtimi është pjesëmarrja në gara publike dhe prezantimi i projekteve private të investimeve në Shqipëri.
“Jam shumë i impresionuar me ndryshimet e shpejta të ndodhura në Shqipëri në të gjitha fushat, por interesi ynë është të qëndrojmë në fushën e infrastrukturës, pasi ritmet e mëdha të rritjes në këtë fushë tërhoqën vëmendjen e kompanisë AKTOR dhe na bënë të marrim vendimin për të investuar në Shqipëri”, nënvizoi dimitris Koutras.
Duke e falënderuar bordin e kompanisë AKTOR për vendimin për të investuar në infrastrukturën shqiptare, kryeministri Berisha, i prezantoi, zotit Koutras arritjet në lëmin e infrastrukturës dhe planet e investimeve në të ardhmen.
Kryeministri e cilësoi të rëndësishme për biznesin dhe ekonominë shqiptare bashkëpunimin me një kompani të standardeve të larta si kompania AKTOR, ndaj i tërhoqi vëmendjen kryetarit të bordit, Koutras, për projektet e mundshme të bashkëpunimit si rrugën Tiranë-Elbasan, segmente të rrugës së Arbrit, Boshti i Jugut, zgjerimin e autostradës Milot-Shkodër dhe unazën e madhe të Tiranës, për të cilat kompania greke shprehu interesin e saj.
Duke vlerësuar mbështetjen ndaj biznesit si një kusht të rëndësishëm në zhvillimin e shpejtë të vendit dhe përballimin e krizës ekonomike botërore, kryeministri Berisha, garantoi drejtuesit e kompanisë AKTOR për transparencën e proceseve të tenderimit për veprat e infrastrukturës publike si dhe lehtësi operimi në fushën e investimeve private, në përputhje me legjislacionin e Shqipërisë.
mit/NOA
