Shkodër, 9 Qershor, NOA /Milena Selimi - “Paqja në botë është akoma një utopi e madhe, por shpresën për një të ardhme më të mirë mund ta gjejmë në gjeneratat e reja dhe në muzikën që nuk ka barriera, kalon edhe mbi diferencat racial dhe kulturore”, - këto janë fjalët e violinistit Rrok Jakaj, i cili u nda nga jeta disa vite më parë, emrin e të cilit e mban shoqata në qytetin e Shkodrës dhe për nder të të cilit organizohet Shkodra Jazz Festival, tashmë në edicionin e tij të gjashtë.
Shkodra Jazz Festival e merr nismën nga “Shoqata Kulturore Rrok Jakaj”.
Organizatore e festivalit është “Optional Music International”, udhëheqës dhe drejtor artistik Florian Jakaj dhe si koordinatorë kanë kontribuar Ardian Dodani e Arjan Stajka.
Festivali i cili do të zhvillohet më 11 dhe 12 qershor në qytetin e Shkodrës, i kushtohet violinistit të shquar Rrok Jakaj, i ndarë para kohe nga ne, i cili ishte dhe iniciatori.
Marrin pjesë muzikantët: Isaac Turienzo, një nga muzikantët më të rëndësishëm spanjollë të muzikës jazz që nga vitet ’90 dhe që e ka prezantuar Spanjën në shumë festival të rëndësishme të jazz-it në botë.
Të tjerë pjesëmarrës do të jenë : Jorge Pardo, The Ockus Rockus Bande, Ein Orge(S) Duo, me Orges Toçen (vokal&kitarë) dhe Hanibal Scheutz (kontrabass)
Shoqata ka si objektiv ringjalljen e sentimentit të lirisë kulturore të qytetit të lindjes së Rrokut, në një qytet me tradita të lashta muzikore dhe artistike, t’i kthejë Shkodrës “kolonën zanore” dhe të bëjë këtë të fundit ambasadoren e imazhit të këtij qyteti me shpirt krijues.
m.s/NOA
