Australi, 11 Qershor NOA - Tashmë çdo shqetësim ka mbaruar për Abby Sunderland, 16 vjeçare e cila ishte shpallur si e humbur në Oqeanin Indian. Vajza është ende në bordin e një varke me vela, me të cilën është në përpjekje për të bërë e vetme udhëtimin rreth botës. Prindërit e vajzës kanë qartësuar gjithçka duke bërë të ditur se ajo është në gjendje të mirë shëndetësore dhe kjo, pasi ishte deklaruar e humbur.
Fillimisht, frika më e madhe ishte tek anija e cila supozohej e përmbysur, duke shkaktuar panik dhe një gjendje të keqe tek të afërmit e vajzës.
Ndërkohë, rojet bregdetare Australiane dërguan tre njësi në ndihmë të Abby, e cila u arrit të gjendej dhe babai i saj pohoi se ajo është në gjendje të mirë dhe shtoi se kushtet klimaterike janë duke u përmirësuar gjë e cila do të bëjë të mundur që 16 vjeçarja të arrijë qëllimin e saj.
Vajza ishte e vendosur në një sipërfaqe prej 3.600 km nga brigjet perëndimore të Australisë.
Babai i gjashtëmbëdhjetëvjeçares konfirmoi se ai kishte folur me vajzën e tij disa herë për ta ndihmuar në zgjidhjen e një problemi me motorin e anijes me vela.
Sunderland është nisur në këtë udhëtim solitar më 23 janar nga Marina del Rey, në Kaliforni, me anije e saj “Sytë e Egër” dhe kjo për të arritur qëllimin si personi më i ri që ka udhëtuar nëpër botë e vetme.
r.b/NOA
