Tiranë, 11 qershor, NOA – Zgjidhnin viktimën e radhës duke parë sendet me vlerë që mund të kishte dhe në rrugica periferike të Tiranës e sulmonin duke i marrë të gjitha paratë dhe aksesorët me vlerë.
Kjo është skema sesi ushtronte aktivitetin një grup të rinjsh të cilët kryenin vjedhje me dhunë në kryeqytet. Policia ka arrestuar tre të rinj të cilët janë; Kastriot Baftjar Izsmailaj, 19 vjeç, banues në Paskuqan, Tiranë, Besmir Ambeni Natolli, 21 vjeç, banues në Kodër Kamëz, Tiranë dhe Valmir Stak Gecaj, 21 vjeç, banues në Tiranë.
Goditja e fundit që kanë bërë tre të rinjtë ka qenë dje, kur i kanë marrë një bashkëmoshatari varësen e floririt dhe gjithë shumën e lekëve që kishte me vete. Ngjarja ka ndodhur pas pallateve në qendër të Tiranës.
“Këto shtetas, dyshohen se në bashkëpunim me njëri tjetrin, ditën e djeshme në rrugën “Ded Gjon Luli”, në Tiranë (prapa restorant Piacës), kanë grabitur me dhunë një bashkëmoshatarin e tyre, duke i marrë një varëse floriri si dhe të gjitha sendet personale”, thuhet në njoftimin e policisë.
Policia sqaron se ky grup kriminal në bashkëpunim midis tyre, kanë realizuar një sërë vjedhjesh në kohë e vende të ndryshme në Tiranë.
“Aktualisht në bashkëpunim me Prokurorinë e Rrethit Gjyqësor Tiranë, vazhdon puna hetimore për të dokumentuar tërësisht aktivitetin e tyre kriminal, me tendencë grabitjen me dhunë”, thuhet në njoftimin e policisë.
m.xh/NOA
