Tiranë, 11 qershor, NOA – Reforma në shëndetësi do të hyjë në një faze të re, atë të përzgjedhjes së drejtuesve të klinikave shtetërore mbi bazën e një konkurrimi ndërkombëtar dhe miratimin e kandidaturave nga një komision i posaçëm.
Ky vendim është marrë në takimin e radhës së Task Forcës për Shëndetësinë. Ky takim është drejtuar nga Kryeministri Berisha dhe çështja e diskutimit ishte Fakulteti i Mjekësisë dhe reformimi i tij.
“Pas diskutimeve të gjëra u përcaktuan mekanizmat e zgjedhjes së shefave të klinikave, u vendos që ky proces ti nënshtrohet konkurrimit të hapur e ndërkombëtar si dhe shqyrtimit në komisionet e ngritura për këtë qëllim. Vendimi përfundimtar do të merret nga një bord i posaçëm”, thuhet në njoftimin e Kryeministrisë për takimin.
Anëtarët e Task Force kanë deklaruar se mbi roli i veçantë që kanë shefat e klinikave, jo vetëm në diagnostikimin e trajtimin të pacientëve, por dhe në kërkimin shkencor, në përgatitjen e studentëve e stafeve si dhe në menaxhimin e sektorit që ata drejtojnë. Kjo është dhe arsyeja që u vendos se përzgjedhja e tyre duhet bërë konform kërkesave në rritje të kohës dhe standardeve më të larta.
Në lidhje me curikulat e lëndëve që studiohen në dy vitet e fundit në Fakultetin e Mjekësisë, u vendos që krahas lëndëve të detyruara të përcaktohen edhe lëndët me zgjedhje.
“Lëndët me zgjedhje janë shumë të rëndësishme për të nxitur talentin dhe dëshirat e studentëve, për t’u krijuar atyre mundësitë për thellimin e dijeve dhe të kërkimit shkencor në ato disiplina, për të cilat ata kanë krijuar preferencat më të mëdha gjatë viteve të studimit”, tha Berisha.
Ai shtoi se reformat duhet të përfillin interesat, ëndrrat dhe opinionet e studentëve në çdo fushë të arsimit të lartë.
Kryeministri i kërkoi ministrit të Arsimit që lëndët me të drejtë zgjedhjeje të shtrihen në çdo degë, edhe në fakultetet e tjera, në programe masteri apo doktorature.
Në takim u diskutua dhe për rekrutimit të pedagogëve të rinj në Fakultetin e Mjekësisë, rritjes së numrit të tyre, në mënyrë që raporti pedagog-studentë ti afrohet vendeve të OECD-s.
m.xh/NOA
