Sport-Botëror/ Grupi A, Afrika E Jugut E Meksika Ndahen Në Barazim
TIRANË, 11 Qershor /ATSH- Gjergji Mima/ - Përfundoi në barazim 1-1 ndeshja e parë e Botërorit 2010 mes vendasve të Afrikës së Jugut dhe Meksikës, e vlefshme për Grupin A, ku bëjnë pjesë edhe Franca e Uruguaji.
Takimi i zhvilluar në "Soccer Stadium" të Johanesburgut është dominuar nga Meksika gjatë gjithë 90 minutave, por të parët kaluan në avantazh afrikanët pas një kundërsulmi të finalizuar nga Tshabalala në minutën e 55-të të takimit.
Pas shumë përpjekjeve, mbrojtësi meksikan i Barcelonës, Rafael Marquez, barazoi shifrat në minutën e 79-te, duke mbajtur skuadrën e tij në garë.
Për t'u theksuar është anullimi i golit të sulmuesit meksikan, Carlos Vela, në pjesën e parë dhe një shtyllë në minutat e fundit nga sulmuesi afrikanojugor Mphela, i cili u gjend i vetëm përballë portierit Perez.
Në orën 20:30 po për këtë grup do përballen Franca dhe Uruguaji në stadiumin e Cape Toun. /a.ke/
