Thaçi: Kosova Po I Afrohet Ditës Së Opinionit Të Gjnd-Së, Hapet Kapitull I Ri Drejt Njohjeve E Integrimeve
PRISHTINË, 11 Qershor /ATSH-B.Jashari/.- Kosova po i afrohet ditës kur do të prezantohet opinioni i Gjykatës Ndërkombëtare të Drejtësisë për shpalljen e Kosovës shtet i pavarur dhe sovran, i cili do të hapë një kapitull të ri drejt njohjeve të reja e integrimeve, tha sot Kryeministri Hashim Thaçi në mbledhjen e qeverisë.
"Është ky një opinion i shumëpritur prej institucioneve, qytetarëve të vendit e në të njëjtën kohë, prej faktorit ndërkombëtar, në mënyrë që për shtetin e Kosovës, të ketë ecje përpara, njohje të reja dhe natyrisht, një proces shumë më të shpejtë të integrimit të saj në strukturat euroatlantike, NATO, Bashkimin Evropian, po edhe në Organizatën e Kombeve të Bashkuara", theksoi Thaçi.
Sipas tij, pavarësisht nga opinioni që do të prezantohet nga Gjykata Ndërkombëtare e Drejtësisë, për Kosovën do të ketë njohje dhe do të hapet kapitulli i ri, kapitulli i integrimeve në organizmat ndërkombëtare.
Opinioni i Gjykatës Ndërkombëtare të Drejtësisë për legjitimitetin e shpalljes së pavarësisë së Kosovës pritet të shpallet në korrik të këtij viti./s.s./
