Ministria E Brendshme: Rama Nuk Dëshiron Që Të Hiqet Muri Shengen Për Shqiptarët
TIRANE, 12 Qershor/ATSH/.- Ministria e Brendshme, nëpërmjet një deklarate për shtyp, shprehu sot shqetësimin për agresionin e vazhdueshëm të Kryetarit të Partisë Socialiste, Edi Rama, kundër procesit të liberalizimit të vizave për qytetarët shqiptarë.
Duke marrë shkas nga deklarata e z.Rama se nga brigjet shqiptare vijon trafiku i klandestinëve, Ministria e Brendshme informon opinionin publik se "autoritetet italiane kanë konfirmuar se skafi me klandestinë i kapur dje, nuk ishte nisur nga brigjet shqiptare, por nga brigjet greke".
"Ky është vetëm një nga sulmet e z. Rama për të baltosur arritjet më domethënëse të Shqipërisë që çuan në propozimin historik të Komisionit Europian për heqjen e vizave për qytetarët shqiptarë", thuhet në këtë deklaratë.
Sipas Ministrisë së Brendshme "kryetari i PS u përpoq çdo ditë të dekurajojë qytetarët shqiptarë, duke thënë se nuk do të mund të plotësoheshin kriteret e kërkuara të udhërrëfyesit për liberalizimin e vizave".
"Të gjitha këto fakte dëshmojnë se z. Rama nuk dëshiron të hiqet muri Shengen për shqiptarët, se nuk dëshiron që shqiptarët të lëvizin të lirë në Europën e Bashkuar", thuhet në deklaratën e Ministrisë së Brendshme, e cila i bën thirrje z. Rama dhe Partisë Socialiste të heqin dorë nga ky agresion ndaj heqjes së vizave, sepse po veprojnë kundër një interesi jetik dhe çështjeje dinjiteti të shqiptarëve./s.s./
