Tiranë, 15 qershor, NOA – Partia Demokratike ka akuzuar sot Partinë Socialiste se duke shpërndarë informacione të rreme në media, në lidhje me kontratat për lobing të PD-së, po përpiqet që të fsheh gjurmët e një lobingu kundër interesave të vendit që drejtuesit e Bashkisë së Tiranës kanë firmosur për PS-në.
Duke përgënjeshtruar artikullin e botuar në një media të përditshme, Partia Demokratike, ka theksuar se marrëveshja e lobingut me një kompani në SHBA ka qenë për hyrjen e vendi në NATO dha ish Kryeministri Fatos Nano nuk ka asnjë lidhje më ketë kontratë.
“Deklarojmë me përgjegjësi të plotë se kontrata është ligjore dhe transparente si drita e diellit dhe se qëllimi i saj ka qenë lobimi për anëtarësimin e vendit në NATO.
Gjithashtu kontrata në të gjithë termat e saj është nënshkruar dhe negociuar nga zyrtari përgjegjës i Partisë Demokratike Flamur Noka”, thuhet në reagimin e Partisë Demokratike.
Për këtë qëllim, PD ka vënë në dispozicion të të gjitha mediave marrëveshjen e firmosur me kompaninë amerikane.
“Më tepër se përfshirjen e çuditshme në këtë marrëveshje, Edvin Rama me sa duket po kërkon të fshehë gjurmët e një lobingu kundër interesave të vendit dhe të një afere që implikon zhdukjen e fondeve publike dhe të taksave të qytetarëve të Tiranës për interes të Partisë Socialiste”, thuhet në njoftimin e PD.
m.xh/NOA
