Tiranë, 16 qershor, NOA – Vendimi i qeverisë për heqjen e vizave me Serbinë, takimet e nivelit të larta me zyrtarët serb dhe një sërë angazhimesh të tjera të diplomacisë shqiptare synojnë integrimin e shqiptarëve të Luginës së Preshevës.
Kjo është deklarata që ka bërë sot zëvendëskryeministri dhe ministri i Jashtëm, Ilir Meta në një takim me nxënës të dalluar të Luginës së Preshevës.
“Jo brenda një dite mund të ndodhin mrekulli, por jam i sigurt se kjo kohë e re dhe kjo politikë e re që ndjek Shqipëria dhe që kërkon dhe Bashkimi Europian nga të gjithë vendet që duan të anëtarësohen në rajonin tonë, padyshim që do të sjellë një progres për Luginën e Preshevës”, u shpreh Meta.
Kreu i diplomacisë shqiptare ka theksuar se kërkesa për integrimin e rajonit në BE vjen në mënyrë të qartë nga BE-ja dhe se vendet respektive duhet të tregojnë se janë të gatshme të ndërtojnë marrëdhëniet të mira mes tyre.
Duke u ndalur në vendimin për heqjen e vizave me Serbinë Meta theksoi dhe një herë se i shërben integrimit të rajonit.
“Ne jemi të bindur se ky vendim i Qeverisë tonë i shërben integrimit rajonal dhe integrimit të rajonit tonë në Bashkimin Evropian. Gjithashtu shpreh bindjen se dhe Qeveria e Serbisë, që po punon për integrimin e saj në BE, do të ndërmarrë të njëjtin hap, dhe qytetarët e Shqipërisë të lëvizin pa viza në Serbi, siç lëvizin në Maqedoni, Kosovë dhe Malin e Zi”, u shpreh Meta.
m.xh/NOA
