Tiranë, 16 qershor, NOA – Ndryshimet në Rregulloren e Kuvendit janë një hap mbrapa nga ana e mazhorancës dhe çojnë në thellimin e krizës institucionale në vend.
Ky është qëndrimi që ka mbajtur sot Grupi Parlamentar i Partisë Socialiste në mbledhjen e radhës, ku është diskutuar për situatën politike në vend.
Sipas njoftimi të PS-së, deputetët e kanë diskutuar mbi qëndrimin “refraktar dhe bllokues të mazhorancës për zgjidhjen e krizës politike, institucionale e ekonomike”.
Në mbledhjen e sotme grupi i deputetëve të PS-së, vlerësoi se ndryshime në rregullore janë bërë në mënyrë të njëanshme dhe “bien ndesh me praktikat më të mira parlamentare europiane të rregulloreve të funksionimit të parlamenteve”.
Gjithashtu deputetët socialistë e konsiderojnë këtë akt të mazhorancës një hap më shumë për thellimin e krizës politike drejt institucioneve kushtetuese, duke cenuar rëndë drejtpërsëdrejti pavarësinë e tyre, thuhet në njoftimin e PS.
m.xh/NOA
