Prishtinë, 17 Qershor, NOA - Thellimi i përkushtimit të institucioneve të Kosovës për perspektivën evropiane si edhe procesi i liberalizimit të vizave për qytetarët e Kosovës apo marrëveshja tregtare me Bashkimin Evropian kanë qenë në qendër të një takimi që kryeministri i Kosovës, Hashim Thaçi, zhvilloi në ditën e parë të vizitës së tij zyrtare në Bruksel me komisionerin për Zgjerim të BE-së, Stefan Fule.
Lajmi bëhet i ditur nga qeveria e Kosovës, sipas të cilës, palës kosovare i është shprehur qëndrimi se deri në fund të verës pritet që Kosova të pranojë Udhërrëfyesin për liberalizim të vizave.
“Kosova është në pritje të rekomandimeve të BE-së për pyetësorin për marrëdhëniet tregtare. Qeveria e Republikës së Kosovës është e përgatitur dhe e gatshme për pranimin e Udhërrëfyesit për liberalizimin e vizave”, theksoi Thaçi, duke shtuar se Kosova ka ndërtuar raporte shumë të mira me fqinjët, me Shqipërinë, Maqedoninë dhe Malin e Zi, si dhe është e interesuar të ndërtojë raporte të mira fqinjësore, si dy shtete të pavarura edhe me Serbinë, në shërbim të bashkëpunimit rajonal.
Përfaqësuesit e Komisionit Evropian thuhet ta kenë falënderuar kryeministrin Hashim Thaçi për suksesin e arritur nga qeveria e Kosovës në përmbushjen e kritereve teknike në funksion të pranimit të Udhërrëfyesit për liberalizim të vizave.
n.e/NOA
