Berlin, 17 Qershor, NOA - Mbi 100.000 nxënës nga e gjithë Gjermania nuk shkuan sot në shkollë, por në punë dhe me të ardhurat e siguruara prej saj, ata do të financojnë projekte humanitare në Evropën Juglindore.
Pritet që të ardhurat të kapin shumën prej 1.6 milionë euro, prej të cilave 190 mijë shkojnë në favor të një projekti të Shoqatës Arsis në ndihmë të fëmijëve të rrugëve në Tiranë.
Merle Wilke, zëdhënëse e organizatës "Schueler helfen Leben" (Nxënësit ndihmojnë jetën) tha se projekti kujdeset për fëmijët e rrugës. Do të financohet një qendër e hapur, ku fëmijët mund të shkojnë të informohen për tema të ndryshme, si shëndeti, higjiena, shkolla, por projekti do të financojë edhe punëtorët socialë, që shkojnë në lagjet e Tiranës, ku ka shumë fëmijë në rrugë e të kujdesen për ta." Projekti i shoqatës "Arsis" u përzgjodh në maj nga 250 nxënës të mbledhur në Berlin nga e gjithë Gjermania. Aksioni zhvillohet nën patronazhin e kancelares, Angela Merkel.
Në të marrin pjesë afro 900 shkolla. Me pjesën tjetër të të ardhurave nxënësit do të financojnë projekte të tjera në Ballkan, ndër to edhe një qendër rinore në Rahovec.
"Dita sociale 2010" zhvillohet për herë të 10-të.
DW
