Ahani: Sanksionet E Be-Së Nuk Do Të Pengojnë Iranin Për Programin Bërthamor
TEHERAN, 19 qershor /ATSH-AFP/ - Sanksionet kundër Iranit shtuar nga Bashkimi Evropian atyre të OKB-së nuk do të pengojnë Teheranin të vazhdojë programin bërthamor, konfirmoi zëvendësministri iranian i Punëve të Jashtme, cituar sot nga agjencia zyrtare e lajmeve ''Irna''.
"Vendimi i ri i Bashkimit Evropian për intensifikimin e sanksioneve kundër Iranit (...) është i dëmshëm ndërkohë që Teherani po përgatitet t'i përgjigjet një oferte për dialog nga përfaqësuesja e lartë e Bashkimit Evropian e Punëve të Jashtme, Catherine Ashton'', theksoi Ahani gjatë takimit me zyrtarët gjarman në Berlin, sipas ''Irna-s''.
Sanksionet Evropiane nuk do të kenë asnjë efekt mbi vendosmërinë e qeverisë dhe popullit iranian për të ushtruar të drejtën legjitime për shfrytëzimin e teknologjisë bërthamore nën mbikëqyrjen e AIEA-s, Agjencisë Ndërkombëtare të Energjisë Bërthamore'', shtoi Ahani.
Bashkimi Evropian vendosi të miratojë kundër Iranit sanksione më të ashpra se ato të votuara më 9 qershor nga Këshilli i Sigurimit të OKB./
/ec/
