Bishkek, 19 qershor, NOA – Thirrjen drejtuar vendeve të OKB-së, nga Sekretari i Përgjithshëm, i OKB-së, Ban Ki Mun, për të mbledhur një fond ndihme prej mëse 60 milion eurosh për Kirigizinë e shkatërruar nga dhuna etnike e javëve të fundit, e kanë paraprirë, Shtetet e Bashkuara të Amerikës, të cilat kanë vendosur ta ndihmojnë Kirgizinë me më shumë se 32 milion dollarë.
Në vizitën e sotme në Bishkek, zyrtari i lartë i Departamentit amerikan të shtetit, Robert Blake, pas takimit me kryetaren e përkohëshme të shtetit të Kirgizisë, Roza Otunbajeva, ripërsëriti premtimin se Uashingtoni do të japë më tepër se 32 milionë dollarë ndihma humanitare për Kirgizinë, për t’u ardhur në ndihmë të zhvendosurve si dhe për qetësimin e situatës në pjesën jugore të vendit.
Në këtë takim, Blake i kërkoi autoriteteve kirgize që të krijojnë kushtet për kthimin e sigurt të mijëra refugjatëve të zhvendosur nga banesat e tyre për shkak të dhunës etnike.
Ndërsa ish presidenti i Kirgizisë, i përmbysur me revolta në muajin prill, Kurmanbek Bakijev, në ekzil, mohoi përfshirjen në trazirat më të fundit, pak ditë më parë ishte sekretarja amerikane e shtetit, Hillari Klinton, e cila deklaroi për nxitjen e dhunës etnike ndoshta duhet të fajësohet ish presidenti i Kirgizisë, Bakijev.
Ka qenë Uashingtoni që u bëri thirrje Kombeve të Bashkuara dhe Uzbekistanit për t’ofruar ndihmë humanitare rreth 400 mijë të zhvendosurve nga dhuna etnike në Jug të Kirgizisë, qytetin, Osh.
Vetë liderja e përkohëshme kirgize, Rosa Otunbajeva pranoi së gjatë dhunës etnike që pushtoi Kirgizinë, mund të jenë vrarë mëse 2 mijë vetë, plot dhjetë herë më shumë se ç’mendohej.
mit/NOA
