Nju Jork, 22 qershor, NOA – “Këshilli i Internacionales Socialiste rikonfirmoi qëndrimin e Komitetit të Europës Juglindore, duke e mbështetur Partinë Socialiste dhe të gjithë opozitën shqiptare në përpjekjen e vet për transparencë”.
Kështu është shprehur lideri socialist Edi Rama, në forumin e lartë të Internacionales Socialiste që po mbahet në Nju Jork.
Rama rishtas e ka konsideruar transparencën një domosdoshmëri për një demokraci funksionale, për një parlament funksional, për një qeverisje funksionale, të një vendi i cili po troket në derën e Europës për t’u integruar tërësisht në familjen europiane.
Sipas Ramës, shqetësimi që kjo mungesë transparence është e shtrirë në të gjithë procesin qeverisës, e cila mbulon jo vetëm vërtetësinë e procesit zgjedhor, por mbulon edhe mëkatet që duhet të dalin përpara drejtësisë, mbulon edhe të dhënat dhe shifrat e ekonomisë, është një shqetësim në rritje i botës demokratike, një shqetësim që sipas kryesocialistit Edi Rama, është shprehur nga Internacionalia Socialiste dhe nga e gjithë familja socialiste dhe progresiste e botës mbarë.
Rama foli edhe për takimin me kryeministrin grek, Papandreu.
“Ishte kënaqësi dhe privilegj në këtë kohë që të ndaj këtë shqetësim edhe me Kryeministrin Papandreu, i cili e nënvizoi domosdoshmërinë e zgjidhjes së kësaj krize përmes transparencës dhe kushtetueshmërisë, në mënyrë që Shqipëria të nxitojë përpara dhe të mos ngadalësojë procesin e vet të integrimit europian.”
Kryetari i Partisë Socialiste Edi Rama shoqërohet në punimet e Këshillit të IS nga Sekretarja për Marrëdhëniet me Jashtë, Arta Dade dhe nga Sekretari i Grupit të deputetëve, Taulant Balla.
mit/NOA
