Tiranë, 23 Qershor, NOA – “Miratimi i rezolutës për Shqipërinë sot në Parlamentin Evropian, përbën një votë historike për qytetarët e saj. Ndaj dua t’i falënderoja europarlamentarët dhe t’u shpreh mirënjohjen e thellë për votëbesimin e shkëlqyer që dhanë ndaj qytetarëve shqiptarë”.
Me këto fjalë gjatë mbledhjes së qeverisë, kryeministri Sali Berisha, ka përshëndetur miratimin në komisionin e Jashtëm të PE-së e rezolutës për procesin integrues të Shqipërisë, e cila parashikon liberalizimin e afërt të vizave me Bashkimin Evropian, brenda vitit 2010.
Sipas tij, “dita e sotme shënon një arritje madhore në procesin e heqjes përfundimtare të vizave, proces ku sipas Traktatit të Lisbonës, Parlamenti Evropian ka një zë përcaktues”.
“Votimi i sotëm ishte solidaritet i ndershëm dhe miqësor i përpjekjeve të qeverisë dhe gjithë institucioneve të vendit, të cilat me përkushtim të madh kanë punuar për të kthyer në realitet të gjitha kërkesat e Udhërrëfyesit”, tha më tej kreu i qeverisë.
Pa fshehur gëzimin e tij për këtë ngjarje, Berisha nënvizoi se “ka qenë pikërisht ky seriozitet i qeverisë dhe institucioneve shqiptare, si edhe reformat e thella të cilat zhdukën çdo lloj hezitimi për t’u dhënë të drejtën e lëvizjes së lirë në hapësirën Shengen qytetarëve shqiptarë”.
“Por edhe i seriozitetit të madh me të cilin ne e kemi trajtuar këtë çështje për t’u garantuar qytetarëve një dimension të madh, atë të lëvizjes pa viza në Bashkimin Evropian”, shtoi ai.
Në fund, këtë çështje ai e përmbylli duke thënë se “procesi është i pandalshëm dhe se qeveria do të angazhohet për të zbatuar edhe tre rekomandimet e Komisionit Evropian të njoftuara nga komisionerja Malstrom”.
n.e/NOA
