Korçë, 23 Qershor 2010 NOA Alba Filipi - Ambasadori Lohan viziton Voskopojën për të parë nga afër ndihmën e Bashkimit Evropian me autoritetet lokale, banorët, shoqërinë civile dhe biznesin, raporton korrespondentja e agjencisë NOA.
Shefi i Delegacionit të Bashkimit Evropian në Shqipëri, Ambasadori Helmuth Lohan fillon nesër më 23 qershor 2010, një tur dy ditor në Voskopojë ku do të shohë nga afër rezultatet e projektit prej gjysmë milioni Euro të financuar nga Bashkimi Evropian për zhvillimin e qëndrueshëm dhe të integruar të komunës.
Gjatë vizitës së tij Ambasadori Lohan po i kushton një vëmendje të veçantë ndikimit të projektit në jetën e banorëve dhe fermerëve si dhe në trashëgiminë kulturore të zonës.
Që nga fillimi i nëntorit 2007, projekti “Krijimi i një plani strategjik për zhvillimin e qëndrueshëm dhe të integruar të Komunës së Voskopojës” ka punuar për të krijuar kushtet e duhura për zhvillimin e bujqësisë, promovimin e trashëgimisë lokale natyrore, historike dhe kulturore si dhe në zhvillim e turizmit.
Projekti synon të krijojë dhe forcojë strukturat e komunitetit lokal në mënyrë që ta drejtojë zhvillimin drejt përfshirjes së komunitetit.
Gjatë zbatimit të tij projekti ka mundësuar rritjen në bujqësi, prodhimin e mjaltës dhe produkteve të artizanatit dhe në zhvillimin e kapaciteteve të turizmit.
Zbatimi i projektit do të vazhdojë deri në 2012, në partneritet me autoritetet vendore dhe Shoqatën e Zhvillimit të Bujqësisë të Zonave Malore (ADAD).
r.n/NOA
