Itali - Asnjë Vendim Mbi Ofertën Izraelite Që Frattini Të Vizitojë Gazën
ROMË, 25 qershor /ATSH-ANSA/ - Ministri i Jashtëm italian, Franco Frattini ende nuk ka vendosur lidhur me faktin nëse do të pranojë apo jo propozimin e homologut të tija izraelit, Avigdor Lieberman, që të kryesojë një delegacion të krerëve diplomatikë të vendeve të Bashkimit Evropian në një vizitë në Rripin e Gazës, thuhej në një njoftim të Ministrisë së Jashtme.
Ministri i Jashtëm izraelit e bëri këtë ftesë dje gjatë një takimi me Frattinin, në Itali dhe fakti që kjo u bë publike shumë shpejt në shtyp krijoi irritim si për Italinë po ashtu edhe Izraelin.
Në këtë deklaratë, Ministria e Jashtme sqaronte se vendimi mbi vizitën në Gaza kërkonte konsultime paraprake "të cilat nuk janë mundësuar ende si pasojë e publikimit në media të disa çështjeve të caktuara, për të cilat ishin në dijeni vetëm një grup i caktuar personash".
Ministria shtonte se Frattini do t'i kthente një përgjigje propozimit izraelit "pas një këshillimi me aleatët evropianë dhe ndërkombëtarë të Italisë".
Sipas shtypit izraelit, Lieberman kërkoi që delegacionin e BE-së, që përveç Italisë do të përfshijë ministra nga Britania, Franca, Gjermania dhe Norvegjia, të zhvillojë një vizitë që të vërtetohet se në Gaza nuk ka krizë humanitare.
Ministria i Jashtëm izraelit kërkoi që delegacioni të vizitojë po ashtu qytete kufitare izraelite që kanë qenë nën shënjestër të raketave të lëshuara nga territoret palestineze.
Megjithëse e kritikoi Izraelin për moslejimin e hyrjes së ministrit gjerman në Niebel, ministri i jashtëm gjerman, Guido Westerwelle deklaroi sot se po të ishte e mundur për sa i përket axhendës zyrtare do të pranonte një ftesë të Izraelit për të vizituar Rripin e Gazës./
/i.p/
