Tiranë, 25 Qershor NOA/ Milena Selimi - “Out of touch” (“Shkëputje nga realiteti’), është puna e fundit e kineastit dhe regjisorit Andi Deliana.
Në fakt, xhirimet kanë përfunduar pak muaj më parë, por tashmë regjisori, skenaristi dhe drejtor, Deliana është duke u përgatitur për ndryshimet dhe sfidat.
Momentalisht, filmi ndodhet në procesin përfundimtar të montazhit në Los Anxhelos. Montazhieri aktual i tij është Randy Vandegrift, që është edhe një ndër producentët kryesorë të filmit. Besohet se në fillim të vjeshtës filmi do të jetë gati për premiere në Tiranë, New York, Los Angeles dhe më pas edhe në vende të tjera.
Një ndër financimet kryesore të filmit është realizuar nga Qendra Kombëtare Kinematografike Shqiptare.
Po kështu, filmi ka fituar një donacion edhe nga Organizata “South East European Cinema Network”.
Kjo është një organizatë e 11 shteteve ballkanike në të cilën bën pjesë edhe Shqipëria, e cila financon dhe ndihmon projekte të tilla të shteteve pjesëmarrëse. Kjo organizatë mund të na ndihmojë edhe në shpërndarjen e filmit në Ballkan.
Ndër investuesit kryesorë janë edhe producentët që ai ka bashkëpunuar në SHBA, Randy Vandegrift që është edhe montazhieri i filmit, si dhe Peter Orphanos.
Ndihmë subvencioni dhe teknike gjatë realizimit të filmit kemi pasur në Shqipëri nga Kube Studio e Erfort Kukes si dhe Blendi Kalivaci. Vetë autori veçse regjisori dhe drejtor i këtij filmi ka qenë edhe skenarist së bashku me Enkel Demin.
m.s/NOA
