Ish-Të Përndjekurit Politikë: Të Miratohet Sa Më Shpejt Ligji I Lustracionit
SHKODËR, 26 Qershor/ATSH-G. Marku/- Drejtori i Institutit Kombëtar të Integrimit të të Përndjekurve Politikë, Simon Miraka kërkoi nga Kuvendi i Shqipërisë që të miratojë sa më parë ligjin e lustracionit, si një detyrim ndaj shtresës së të përndjekurve politikë për të pastruar organet e drejtësisë nga personat që urdhëruan dhe ligjëruan torturat dhe vuajtjet çnjerëzore në vitet e regjimit komunist.
Në një takim të organizuar sot në Shkodër, në Ditën Ndërkombëtare të Kombeve të Bashkuara në mbështetje të viktimave të torturës, z. Miraka kërkoi edhe ngritjen e disa muzeve në burgjet ku kanë kaluar kalvarin e vuajtjeve dhe torturave mijëra qytetarë shqiptarë.
"Duhet të kemi muze burgun e Qafë Barit, burgun e Spaçit, duhet të kemi një memorial të diktaturës në Shkodër, në Tiranë, etj", tha Miraka, në takimin e organizuar nga Qendra Shqiptare e Rehabilitimit të Traumës dhe Torturës, në bashkëpunim me degën e Shoqatës Mbarëkombëtare të ish- të Përndjekurve Politikë të Shkodrës. /s.s./
