Tiranë, 27 qershor, NOA – Tre zyrtarë të administratës janë paditur në polici dhe 15 të tjerë kanë marrë gjoba për mos deklarim të pasurive. Inspektorati i Lartë i Deklarimit dhe Kontrollit të Pasurive (ILDKP), njofton se masat e marra janë marrë në zbatim të luftës kundër korrupsionit.
Zyrtarë që kanë marrë ndëshkime akuzohen për shkelje të ligjit “Për deklarimin dhe kontrollin e pasurive...” dhe ligjit “Për parandalimin e konfliktit të interesave...”.
“Pjesa më e madhe e zyrtarëve, për të cilët është aplikuar masa shtrënguese nga Inspektorati i Lartë, janë punonjës të administratës doganore dhe tatimore. Dy zyrtarë të kallëzuar penalisht dhe shtatë të gjobitur për konflikt interesi janë pjesë e organikës së Drejtorisë së Përgjithshme të Tatimeve dhe degëve të saj në rrethe. Ndërsa një zyrtar i kallëzuar penalisht dhe katër të tjerë të gjobitur për konflikt interesi janë pjesë e strukturave të Drejtorisë së Përgjithshme të Doganave”, thuhet në njoftimin e ILDKP-së.
Ndërsa njoftohet se katër zyrtarë janë gjobitur për konflikt mes funksionit publik dhe interesave private janë drejtues të pushtetit vendor; një kryetar bashkie dhe një kryetar komune në Jug të Shqipërisë, një kryetar komune në Qarkun e Tiranës dhe një kryetar komune në Qarkun e Shkodrës.
Sipas ILDKP 14 prej 15 zyrtarëve janë gjobitur me vlerën 100 mijë deri në 200 mijë lekë të reja.
“Inspektorati i Lartë ka përmirësuar teknikat e hetimit administrativ, duke siguruar në këtë mënyrë rezultate më të mëdha në parandalimin e konfliktit të interesave dhe në luftën kundër korrupsionit”, thuhet në njoftimin e ILDKP.
NOA
