Graçanicë, 28 qershor, NOA - Policia e Kosovës ka angazhuar 1500 pjesëtarë të saj për të ruajtur sigurinë në Graçanicë, por edhe në Gazimestan, ku pas mesditës pritet të mblidhen mëse një mijë serbë për të kremtuar festën e Vidovdanit, apo 621-vjetorin e Betejës së Kosovës.
Sikundër mësohet nga zëdhënësi i policisë së Kosovës, liturgjia fetare për këtë ditë është mbajtur nga kreu i Kishës Ortodokse Serbe, patriarku Irinej, ndërsa mësohet se pjesëmarrës në të ishin edhe dy ministra serbë, ndër ta ministri serb për Kosovën, Bogdanoviç, që kanë hyrë në territorin e Kosovës me leje të autoriteteve të Kosovës.
Sipas policisë së Kosovës, që në mëngjes herët nën mbikqyrjen e policisë, nga Mitrovica veriore janë nisur tetë autobusa dhe gjashtë furgonë për në Graçanicë, ndërsa më pas grupi prej 100 motoristëve të ardhur nga Serbia është nisur nga Gazimestani.
Policia e Kosovës pohon se kanë siguruar përcjelljen e aktivitetit gjithsej 40 policë nga Mitrovica dhe sipas tyre nuk është parë asnjë incident.
Në festën e Vidovdanit, që shënon datën kur ushtria serbe pësoi humbje nga Perandoria Osmane, në Betejën e Kosovës, në vitin 1389, nga Serbia rreth 40 pjesëtarë të së ashtuquajturës Garda e Car Lazarit hynë pa iu nënshtruar kontrollit kufitar, ndërsa 900 motoçiklistë dhe qytetarë tjerë, i janë nënshtruar procedurave kufitare.
Sipas policisë së Kosovës, plot 11 delegacione të ndryshme nga Serbia kanë kërkuar lejen e autorieteteve për të marrë pjesë në festën e Vidovanit, e cila vijon me manifestimin pranë monumentit të Gazimestanit.
mit/NOA
