Tiranë, 28 Qershor, NOA - Federata Pan-Shqiptare në SHBA “Vatra” do të dorëzojë një kontribut prej 35.000 dollarësh për zonat e Shkodrës që përjetuan situatën e vështirë të përmbytjeve në fillim të këtij viti.
Një fakt të tillë kryeministrit Berisha ia bëri me dije gjatë një takimi të përbashkët në Tiranë, nënkryetari i kësaj federate, Agim Rexhaj.
Rexhaj e falënderoi Berishaën për mikpritjen dhe i përcolli përshëndetjet më të ngrohta dhe vëllazërore të gjithë anëtarëve të kësaj shoqate, si dhe të të gjithë diasporës shqiptare në SHBA, bashkë me përgëzimet e tyre për arritjet e mëdha të Shqipërisë dhe Kosovës në vitet e fundit.
Ndërsa kryeministri nga ana e tij, i shprehu Rexhajt mirënjohjen dhe vlerësimin e lartë për të gjithë kontributin e vyer, rolin thelbësor dhe të jashtëzakonshëm të Federatës “Vatra”, por edhe të gjithë diasporës shqiptare në SHBA, të cilët kanë qëndruar pranë shqiptarëve dhe zhvillimeve në Shqipëri e Kosovë me një forcë, përkushtim, sakrificë dhe patriotizëm të pashoq.
Gjatë takimit, ai më tej theksoi se në arritjen e pavarësisë së Kosovës, si një nga ngjarjet më madhore për kombin shqiptar, roli dhe përkushtimi i diasporës shqiptare të SHBA ka qenë shumë i rëndësishme.
Ndërsa më pas, Rexhaj i shprehu kryeministrit Berisha mirënjohjen për vizionin dhe përpjekjet e tij në të mirë të kombit shqiptar, duke u ndalur veçanërisht në Rrugën e Kombit Durrës-Morinë dhe duke nënvizuar se Federata “Vatra” do të vazhdojë të jetë si në tërë këto vite në mbështetje të plotë të zhvillimit dhe integrimit të Shqipërisë dhe Kosovës.
n.e/NOA
