Tiranë, 28 qershor, NOA – Pas deklaratave se zgjedhjet e 28 qershorit ishin dëshmia që pasoi edhe marrjen e vendimeve të rëndësishme nga ndërkombëtarët për Shqipërinë, në mbledhjen e grupit Parlamentar të Partisë Demokratike, kryeministri Sali Berisha i kërkoi opozitës që të ushtrojë detyrën e saj dhe të marrë pjesë në të gjitha reformat e rëndësishme që i duhen vendit.
Ashtu sikundër deklaroi edhe në prani të kreut të PPE-ve, se do të mbështesë çdo amendament të opozitës, kreu i mazhorancës theksoi rishtas se “për të gjitha ligjet që kërkojnë miratimin me shumicë votash pra 3/5 e deputetëve, opozita do të ketë të drejtën të sjellë çdo amendament që është brenda standardeve dhe mazhoranca do t’i pranojë ato qoftë për ligjin për imunitetin qoftë për Kodin e ri Elektoral”, deklaroi kryeministri Sali Berisha.
“Ne nuk e kërkojmë këtë bashkëpunim me opozitën, dhe respektin ndaj të drejtës së saj, veç për reformën”, shtoi më tej kryeministri.
Më pas kryeministri ka vijuar ligjëratën e tij në mbledhjen e grupit të PD-së, duke iu referuar 20 vjetorit të rrëzimit të sistemit, një vit që sipas tij po përkon edhe me vendimet më të rëndësishme historike për shqiptarët, liberalizimin e vizave dhe integrimin e shpejtë në BE.
mit/NOA
