Prishtinë, 29 qershor, NOA – Unioni i Gazetarëve të Kosovës (UGK), dënon ashpër sulmin ndaj ekipit të televizionit Top Channel, të ndodhur gjatë përcjelljes së aktivitetit të Vidovanit, në Graçanicë, që përkujton 621 vjetorin e betejës së Kosovës.
UGK në një deklaratë për shtyp e cilëson sulmin ndaj ekipit të gazetarëve të televizionit Top Channel, të papranueshëm dhe si cënim të shprehjes dhe lëvizjes së lirë të gazetarëve.
UGK, kërkon nga institucionet e Kosovës dhe nga ato ndërkombëtarë që të hetohen dhe të marrin dënimin e merituar aktorët që shkaktuan dhunën ndaj gazetarëve në krye të detyrës.
Unioni i Gazetarëve të Kosovës, i ka lëshuar thirrje edhe Policisë së Kosovës që të jenë më vigjilentë në mbrojtje të gazetarëve, për t’u mundësuar atyre një punë profesionale. Në përfundim të deklaratës, Unioni i Gazetarëve të Kosovës i bën thirrje të gjithë kolegëve nga Shqipëria që të punojnë për lirinë e shprehjes dhe të mos bien pre e provokimeve të njerëzve që pengohen nga fjala e lirë.
mit/NOA
