Teksas, 30 Qershor, NOA- Është 21 vjeçe, dhe quhet Lizzie Velasquez nga Austin (Teksas), 1 metër e 57 centimetra e lartë dhe peshon vetëm 25 kilogram, por nuk është anoreksike. Sëmundja që e ka goditur, e ka detyruar të hajë çdo 15 minuta, për një total prej 8000 kalori në ditë, e gjithë kjo për të mbijetuar.
Lizzie vuan nga një sëmundje e panjohur, per te cilen nuk ekziston as dhe një term mjekësor. Kjo sëmundje nuk e lejon atë të shtojë në peshë dhe të absorbojë yndyrat nga ushqimet që ha. Për të mbijetuar, ajo duhet të hajë të paktën 60 herë në ditë, çdo pesëmbëdhjetë minuta. Nëse nuk arrin 8.000 kalori në ditë, nuk mund të mbijetojë. Pavarësisht nga kjo, nuk shton në peshë: në fakt, trupi i saj ka 0 për qind yndyrë dhe peshon 25 kilogram.Vajzë e re, vesh rroba të masës XXS dhe peshohet vazhdimisht duke shpresuar të fitojë disa gram."Gjatë ditës unë ha gjithçka, çokollata, pica, pulë, ëmbëlsira, akullore, kështu që zemërohem pak kur njerëzit më thonë se jam anoreksike. Peshohem rregullisht dhe në qoftë se shikoj se kam fituar peshë, jam personi më i lumtur në botë". - thotë vajza në faqen e saj zyrtare në internet http://www.aboutlizzie.com.
Nëse nuk ha çdo pesëmbëdhjetë minuta, Lizzie nuk ka energji të lëvizë dhe të kryejë asnjë aktivitet, madje dhe mund të vdesë.
Ajo ka lindur vetëm 950 gram dhe në barkun e nënës kishte shumë pak lëng amniotik për të mbrojtur atë.
Mjekët, nuk kanë arritur ende të gjejnë shkakun e kësaj sëmundjeje dhe madje çuditen me faktin se si Lizzie mund të jetë ende gjallë.
Profesor Abhimanyu Garg në Universitetit e Teksasit, i cili ka kohë që ndjek sëmundjen e vajzës, beson se kjo është një formë e "sindromës neonatale progeroid” (NPS), e njohur zakonisht si “sëmundja e plakjes”, një proces që shkakton plakje të përshpejtuar, humbje të peshës trupore dhe shkatërrim të indeve, por disa simptoma të kësaj sëmundjeje nuk korrespondojnë me sëmundjen e Lizzie.
"Ata nuk e kuptojnë se si vajza ime mbijeton. Gjatë këtyre viteve, qindra mjekë janë përpjekur për të kuptuar se cili mund të jetë shkaku i sëmundjes, por ne e kemi trajtuar gjithmonë atë si një fëmijë normal", - thotë nëna e saj.
e.a./NOA
