Sport-Botëror/ Kompanitë E Basteve, Brazili Favorit Për Botërorin
TIRANË, 30 Qershor /ATSH/ - Kur kanë mbetur 8 nga 32 ekipe në garën për trofeun e Kupës së Botës, vazhdon të shtrohet pyetja: "Cili është ekipi pretendent për të fituar Kampionatin Botëror të Futbollit, Afrikë e Jugut 2010"?
Bazuar edhe në parashikimet e kompanive të basteve, një faqe prestigjioze sportive ka bërë renditjen e 8 ekipeve finaliste.
Duke nisur nga fundi, në vend të 8-të qëndron Paraguaji, që bëri histori me kalimin në çerekfinale. Vendin e 7-të e zë Gana, i vetmi vend afrikan që përfaqëson një kontinent të tërë.
Në pozicion të 6-të ndodhet Uruguaji, dy herë Kampioni i Botës, që ka impresionuar në këtë turne. Për Gjermaninë dhe Holandën, parashikimi është i njëjtë, prandaj ndajnë vendin e 5-të dhe të 4-t.
Vendin e 3-të e mban Argjentina, që tani shihet si pretendente e fortë, ndonëse shumë pikëpyetje u ngritën për aftësitë e Diego Maradonës, si trajner.
Kampionia e Europës, Spanja renditet e 2-ta. "Të kuqtë" do të ishin të parët që fitojnë Kupën e Botës, pasi kanë humbur ndeshjen e parë të turneut.
Dhe vendi i parë i takon pikërisht Brazilit, që ka fituar 5 Kupa Bote, në Europë, Amerikë të Jugut, Amerikën Veriore, Azi dhe tani kërkon të gjashtën në kontinentin afrikan. /gj.m//a.ke/
